D’lescht Joer huet de Schäfferot vun der Gemeng Conter gréisser Renovatiounsaarbechten op der Plaz virum CGDIS-Gebai zu Mutfert geplangt. Donieft gouf en neie Carport fir de CGDIS – CIS Mutfert duerch eisen techneschen Déngscht installéiert. De Käschtepunkt fir dës Carport-Installatioun louch bei 33.200 Euro.
D’Plaz virum CGDIS-Gebai gouf tëscht Januar a Juni 2021 reamenagéiert an och drainéiert. Wärend dëser Zäit ass am Kader vum Bassin d’orage WS07 an der route de Remich och d’Kanalisatioun an der Impasse de la Syre laanscht de Fussballsterain bis an de Bassin d’orage erneiert ginn. Bei dësem Chantier goufe sämtlech Reseauen an der Impasse nei verluecht, dorënner d’Post, d’Antenne, de Stroum, den Eclairage, d’Gas- an och d’Waasserleitung (Käschte fir d’Gemeng: 45.000 Euro).
De Schäfferot vun der Gemeng Conter huet an dësem Kader haut op d’Aweiung vum neie Carport fir eis Pompjeeën invitéiert, mat Riede vun eiser Buergermeeschtesch, dem Marion Zovilé-Braquet, a vun eisem Chef de Centre Mutfert, dem Bram Krieps. D’Aweiung gouf mat engem Éierewäin an engem Maufel vum Grill ofgeschloss.
Un dësem Event, deen am klenge Krees ofgehale gouf, hunn den Här Paul Wirtz, Chef de Zone Est, verschidde Chefs de Centre aus der Regioun, de Buergermeeschter vu Waldbriedemes, den Här Thomas Wolter, an d’Membere vum CIS Mutfert deelgeholl.
An eiser Fotogalerie fannt Dir flott Fotoe vum Event.
